Perché scegliemo proprio quel strumento?
Esisti libri, teorie e tesi de laurea su la corelazion caratere-strumento musicale e non sarò mi né a confermali né a confutarli, però poso spingerme a fare qualche considerazion personale.
Perché in banda un picio inizia a sonar un strumento piutosto che un altro? Semplice, perché quello iera el strumento disponibile in quel momento! Parlemose ciaro: non tute le bande ga un capital de poderse permeter de prestar strumenti ale nove leve, e se non ghe xe strumentisti in casa bisogna acontentarse de quel che xe.
Ma non dovemo demorder, un strumento troverà sempre el suo strumentista… magari dopo ani! Eh sì, perché xe inegabile che certe carateristiche carateriali xe comuni tra le sezioni. Ma procedemo per ordine…
Ala bambina magrolina, vestida con cotoleta e calze de nylon ghe sarà proposti come prima scelta flauto o clarineto, al mascieto grandeto e cicioto invece tuba o trombon, dificilmente capiterà el contrario.
De qua, dunque, una prima “division forzada”, pol funzionar, ma el richiamo del tuo strumento xe sempre molto forte, e quindi dopo qualche ano sucedi che la picia - non più in cotoleta - se cimenta col trombon mentre el putel cerca de tapar con pasion tuti i busi del clarin con i diti cicioti.
Caratteristiche tipiche dei componenti
Questo rimescolamento bandistico ne proieta a una imagine de banda con caratteristiche particolari, in cui emergi chiaramente le conesioni tra el caratere e el strumento scelto.
El Maestro
Agitando i brazi gnanca stesi anegando, el se domanda se qualchidun lo guarda e chi ghelo ga fato far, nel mentre el spera che a l’ataco dei tromboni non voli el parruchin del vecio clarinetista sentà davanti.
I Flauti e clarini
I flauti, sopratuto mule - o mule de qualche ano fa - timide, brave, tute impachetade che ridi ne le pause sbirciando el baterista -che no se ofendi i omini flautisti che stà la, fa el suo e noi se la ridi-.
I clarini invece xe quela via de mezo tra flauti e sax…
I sasofoni
I sasofoni xe i estrosi, poetici, distrati - un po’ “Alice nel paese delle meraviglie” per capirse -. Qualunque brano nela loro testa pol esere riconducibile a “the girl from Ipanema” opur a un brano jazz…
I flicorni
I flicorni e i acompagnamenti ciamai amorevolmente “sburtavagoni” - cioè quei che ne la musica (e ne la vita) no vol la gloria, ma fa un otimo lavor de squadra - xe fondamentali per ragiunger i risultati speradi e la loro mancanza fa tremar el teren soto ai piedi ai “frontman” alias trombe …
I tromboni
I tromboni solisti, noti per eser in guera acesa contro le trombe su “chi lo ga più forte” … el suono oviamente. Oltre a esere pericolosi per lori stesi e per i altri con la coulisse, tendi ad eser speso… iruenti -molesti?- nei pasagi, quasi che i volesi far tabula rasa davanti de lori. Al richiamo del Maestro i se la ridi soto i bafi e i se organiza per andar a bever una bira fora. Ah sì, el trombonista non sbaia mai, sbaia sempre el suo vicin.
Le trombe
Le trombe, first lady de la banda, regine… (a volte più drug queen diria…) oviamente esagero. Testarde e determinade come solo una tromba pol eser, in realtà no cedi un secondo a costo de sonar coi denti per rivar a portar a termine el brano e el concerto, anche se i continua a non voler capir che “p” sul spartito sta per “piano” e non per “potente”. Come i tromboni noi sbaia mai ma almeno noi ghe dà la colpa a quel vicin, invece i sbati i dedi sui labri per far veder che xe quei che ga cedù (ma non xe tuoi i labri scusa???) opur i sbatocia i pistoni fazendo finta che sia un problema mecanico e mancanza de oio.
I basi
I ultimi in banco. Quei che pur esendo fondamentali non li calcola mai nisun… e quindi el basista, el sburtavagon capo per ecelenza, se ingegna per eser notà. In ogni banda e in modo diverso, ma tuti i basisti - che soni una polka, un valzer o qualunque altra roba- vardandoli ben, te li vederà intenti a sufiar un fraco in quela ciotola che i usa per bochin, colar de sudor intanto che le man se sposta che gnanca dovesi sonar el “volo del calabrone”. Persone de gran compagnia i basi.
Le percusioni
Sule percusioni bisognasi diferenziar, ma se stemo dilungando tropo, quindi parleremo semplicemente del baterista. El baterista… perché anche se fortunatamente sempre più mule se avicina a sto strumento, speso xe prerogativa maschile. El baterista tendi ad eser un iperativo, con problemi de atenzion, casinista de natura e distrato. Perché quando el tuo brazo destro fa una roba, el sinistro un’altra, la gamba destra una terza e la sinistra una quarta (e zà qua xe strano a non aver personalità multiple) speso la testa xe persa a pensar a altro inveze de vardar el Maestro che zerca de cambiar la velocità del brano. Dopotuto la maieta del baterista disi: “the tempo is whatever I say it is!”
Quindi? Quindi comince sonar qualunque strumento volè o podè. Cambiè, provè, studiè… solo con impegno e tanta dedizion poderè trovar, o meio, vegnirè scelti dal vostro strumento.
