Mujesan doc dal pedigree carnevalesco, Daniele fin da la giovine età eredita dai genitori el morbin mujesan e la pasion per el carneval in tute le sue forme.
E xè proprio fra un balo de le bambole e un giro per la sua Muja vestì da principino che Daniele senti el richiamo de la musica. Comprerà el suo primo strumento a 9 ani in un autogrill durante un viagio: un flauto de plastica arancion.
De là inizia una nova aventura. El picolo Daniele se iscriverà al doposcuola de musica del Maestro Beacovich e l’ano dopo entrerà nela scola de musica dela banda del ’Ongia.
Tropo scoordinà per gestir tuti i tasti de un flauto, un clarino o un sasofono, eco che el Maestro opta per un oton, ma quale oton pol dar a un baso, mingherlin (20kg in tuto) bimbo de 10 ani? La tromba! La più picola (e legera) tra i otoni. E el matrimonio Daniele-Tromba se acingi a rivar ale noze de oro (quasi… non xè cusì vecio…).
Cresendo (solo sula carta de identità, in alteza poco) nol perdi el spirito carnevalesco e gnanca l’ocasion per sonar, che sia come banda Ongia, sia come Frajeri per l’apertura del Carneval , sia con… “se trovemo zo dopo e 'ndemo a sonar in giro???”… chiunque gabi voia de condivider 4 note insieme a lui insoma.
De militar, nela Banda dela Marina, conoserà Corrado e Alessandro, i continua ancora a eser amici, e le colaborazioni musicali prosegui!
Entra nela Guggenband Muja e poi nela Vecia Trieste Show Band nei primi del 2000.
Afidabile, generoso, divertente e a volte brontolon el xè sicuramente el “sagio” dela sezion trombe.