Fin da l'antichità la dinastia Moratto regnava indiscusa nel territorio de la Vecia Trieste, forti dela predominanza numerica e ancora de più dei ruoli istituzionali asegnai.
Ma iera qualcosa che stava per cambiar.
Coreva l'anno 2012 e la famiglia Piuca-Pipitone cominciava a rimpolpar i suoi ranghi, preparando un picolo esercito musicale coordinà da la comandante Fabiana. Un picolo tamburin de nome Davide e una nascente cantante Giorgia se stava cusì preparando al loro destin, fianco a fianco ai loro genitori armadi de tromba e flauto.
Fabiana, col suo caratere docile e poco autoritario -questa xè ironia, per chi non la conosesi-, fin da l'infanzia se iera inamorada del sousaphone, imenso generador de onde sonore contrabase. Ma sa come che xè... meti i troppi lavagi a caldo del steso strumento, meti le dimensioni che superava del dopio quele de la musicista, la se ga ritrovà ala fine a sonar quel che saria diventà un'estension del suo brazo: el flauto, o ancor pezo... l'otavino.
Un'estension usada sì musicalmente, ma anche per comandar a bacheta i poveri musicisti che eroneamente quel giorno gavesi sbaià de meterse anche solo una picola parte dela divisa.
El ruolo iera ormai chiaro. La gaveva un esercito. La gaveva le armi. La gaveva el caratere.
La minuta Fabiana cusì xe diventada nel 2015 presidente indiscusa dell'Asociazion Vecia Trieste.