Percusioni

Fradel de Maria e cognà del Maestro Riccardo, Marco non ga avù molta scelta quando ghe xè sta' chiesto de sonar con la Vecia Trieste.

Già partecipe in altre formazioni musicali de vario tipo, Marco xe sempre sta' un mulo docile, educato, tranquilo, ligio ale regole e mai fora posto.

Ma come un mogwai diventa un feroce gremlin se sfamado dopo mezanote, el dolce Marco diventa una bestia da festa scadenata se meso a contato con zenzero, canela, anice stelato, cardamomo, ortica e ginepro…

Ilaria xe la più picia de la famiglia e sicuramente la più vivace…atualmente sona el rulante e come sua sorela da quando gaveva tre ani ga frequentà vari corsi de propedeutica musicale.

Ga volù seguir le orme del nono e ga deciso de intraprendere lo studio de la tromba…fra qualche ano la vederemo sicuramente sonar tra i otoni!

La più anziana fra i junior, Irene xè la primogenita de la famiglia Gobessi e come el papà se ga apasionà da subito a le percusioni, anche se la mama sperava in un strumento più melodico…

Ga frequentà a partir dai tre ani vari corsi de propedeutica musicale e de percusioni e ga già partecipà a numerose trasferte con la showBand Vecia Trieste.

Come descriver Fabio? Alegro, sempre partecipe, polistrumentista.
Perché se te ga bisogno de un rulante Fabio xe la soluzion! (esendo sempre stada una sua grande pasion).
Perché se invece te ga bisogno de un sax Fabio xe la soluzion! (strumento su cui se ga specializà per ani nela Filarmonica de S.Barbara).
Perché se infine te ga bisogno de un trombon… Fabio xe la soluzion! (avendolo studià per sonar nela Fanfara dei Bersaglieri Enrico Toti de Trieste).

Taca a interomper la quiete dei vicini a 11 ani, se agrega a l'Orchestra a fiati Breg, dove ancora ogi continua a bater sule peli de quela povera bateria. Xe diventà vicepresidente dela banda, ma nol vol diventar presidente, perché non xe ancora in pension (quasi un requisito obbligatorio).
Durante i ani se ga schierà da la parte de molte altre bande, quali Ricmanje, Viktor Parma de Trebiciano, Prosecco, Aurisina, Ongia e Triestinissima, spacando sempre i timpani ai musicisti..

Clase 2013, Giorgia ga seguì mama, papà e fradel in banda fin de picia (dopotuto non gaveva grandi scelte) avicinandose sempre de più al mondo dele case.

Se pol quasi dir che Davide sia nato in banda visto che sua mama ga inizià el travaglio durante un concerto e dal primo giorno el picolo Davide ga sempre dimostrà interese per le BUM BUM.
Classe 2011 Davide ga inizià a studiar bateria a 5 ani e per la felicità de mama, papà e tuto el vicinato no ga intenzion de smeter!
Genere preferito? Rock! Grupo preferito? I Queen ovio!

Pluristrumentista de le coline de Santa Barbara -quasi USA- forgiado da ani e ani de dura formazion bandistica.

Alevado inizialmente come giovine tamburin casinista, con la scoperta che i balini sule partiture no iera musati fracagnai, se ga avicinà al vero mondo dele percusioni.

Ga inizià cusì a disturbar magiormente l'ensamble servindose de timpani, dimostrando che non saveva solo fare casin, ma saveva farlo proprio ben, a ritmo, e qualche volta anche intonà.

El Maestro.

Fio d’arte, Ricardo non podeva che seguir le orme de papà Luciano, nono Romildo e bisnono Nicodemo, iniziando fin da picio a studiar pianoforte e percusioni.

Per motivi ignoti e ancor ogi inspiegabili, inizia a studiar in conservatorio la Viola. Sì, proprio la viola!
Dopo tre ani, quando anche el can scampava a solo veder quel strumento, Ricardo capisi che forsi forsi xè el momento de dedicarse al suo primo amor e finalmente riva a realizar el suo sogno: inizia a studiar percusioni diplomandose nel 1999 al Tartini.