Ta ta ta ta ta ta brummm.
Xè el rombo del trator, regolare e potente quanto el baso de Stefano.
Stefano ga comincià la cariera a quatordize ani con la speranza de salvar dala disgrazia un vecio tamburo abandonado nela sua cantina. Notando però el totale disinterese dei coleghi dela banda ga deciso lui steso de aprender l'arte dela musica per risolvere questo suo problema. Solo a distanza de ani se ga acorto che, studiando el baso tuba, non gavesi podù imparar niente in fato de percusioni.
Ormai però el dado iera trato.
Fin da fanciulo xè sta cresù a pan e note dala famosa Società per Cantautori (SPC, in arte Sobri per Caso) de cui gli amici Stefano, Walter, Dean e Diego fazeva zà parte.
Al contempo fazeva creser le sue abilità dentro la "Banda de Buie", dove veniva ciolto col ruolo de distributor uficiale de Malvasia in quanto talentuoso produtor dela stessa.
Noncurante del peso e de l'ingombro del Sousaphone, te lo pol intraveder nele giornate carnevalesche girar per le cali mujesane sonando, bevendo e magnando senza mai stacarse dal strumento.
Come pol uno magnar, bever e sonar contemporaneamente? Tuti ancora se lo sta chiedendo. Qualchidun disi perfin de gaverlo visto una domenica dele premiazioni dela sfilata de carneval a sonar, saltar e rotear su se steso restando in pie su un picio sgabel, senza mai perdere el minimo equilibrio. Se non xè arte questa?
Nonostante la giovine età, se podesi dir dai suoi modi de fare che xè el classico omo de una volta, ma con lui xè chiaro fin da subito: ta ta ta ta ta ta brummm!